Síguenos
ABEL MARTÍNEZ GONZÁLEZ YE’L GANADOR DEL VIII PREMIU DE RELATOS CURTIOS ‘XOSÉ CAVEDA Y NAVA’
L’escritor Abel Martínez González resultó ganador de la octava edición del concursu de relatos curtios ‘Xosé Caveda y Nava’, convocáu pol conceyu de Villaviciosa n’homenaxe al historiador y políticu maliayu responsable de la ‘Colección de poesías en dialecto asturiano’, primer llibru editáu dafechu nesta llingua. El xuráu, formáu nesta ocasión por Beatriz Redondo Viado, ganadora de la edición anterior, Ángel Valle, profesor y presidente de l’asociación Cubera y Rafael Rodríguez Valdés, técnicu de normalización llingüística y director de la colección de traducciones al asturianu Calume, decidió por mayoría concede-y el premiu al relatu tituláu “El principín, la princesona y el dragonín” del autor uvién, del que destacó l’axilidá del estilu y corrección llingüítica, l’usu de la ironía y l’actualización d’elementos del cuentu tradicional.
Abel Martínez (Uviéu, 1976) ye autor nos últimos años de les noveles Operación feuerschlange 1941 (Radagast, 2023) Vikingos 2035 (Radagast, 2023), amás de tener publicao L’aventura de Minho (ALLA, 2008), ganadora del premiu Uviéu de Narraciones de 2006, la novela xuvenil La maldición de Llucescuria (ALLA, 2012), el volume de relatos Unos cuentos de muerte (La Cruz de Grau, 2010) y diverses collaboraciones en volumenes colectivos y revistes como Lliteratura, Lletres Asturianes o Formientu. Aparte del premiu Uviéu, tamién foi ganador de certámenes como’l Concursu de Cuentos n’Asturianu de Cangas del Narcea, el premiu Asturnews de lliteratura xuvenil o’l de Llectures pa rapazos de l’Academia de la Llingua, ente otros áccesit y menciones.
